Monique Steyn se langverwagte album, Mosaïek, is onlangs vrygestel.

Monique Steyn se langverwagte nuwe album, Mosaïek wat onlangs bekend gestel is, beloof om luisteraars te verras met ’n splinternuwe, baie meer volwasse klank as waaraan hulle tot dusver gewoond was. Die uitreiking word voorafgegaan deur twee trefferalbums, Ek val vir jou, waarmee sy en Snotkop die land behoorlik op horings geneem het en Pienk Champagne wat kort daarna verskyn het. Sy het ook saam met Nicholis Louw, Ray Dylan en Elizma Theron bekendheid verwerf as voormalige lid van die gewilde popgroep, 4Werke, wat verskeie kere platinumstatus behaal het.

Die klassieke, stylvolle voorkoms van die album omslag deur Derick Taljaard waarop Monique direk in die kamera staar terwyl sy met haar kop agteroor lê, getuig van ’n onteenseglike eerlikheid. Arnold Coleske en Paulo Azevedo wat aan die stuur van hierdie album was, het ook in samewerking met Robin Kielly die finale meng daarvan behartig. Die meeste oorspronklike snitte kom uit die bekende liedjieskrywer, Johan Oberholzer se pen terwyl Emil Kraemer en Arri Opperman ook hand bygesit het.

Die titelsnit, Mosaïek beskryf hoe die besluite wat elke mens neem uiteindelik byeen kom om ’n kunswerk te vorm ten spyte van die krake as gevolg van sy of haar foute. Die Boom toon ’n sterk geestelike inslag waarin God se liefde en beskerming in die lewens van mense met die blare en takke van ‘n boom vergelyk word. Dié geestelike ondertoon van hierdie album vind verder ook in haar meesleurende vertolkings van Mynie Grové se Sweef soos ’n arend sowel as Hillary Scott se Thy Will neerslag.

Hartseer is ’n aangrypende duet saam met Ruhan du Toit van Touch of Class faam wat vertel van die absolute moedeloosheid en magteloosheid waarmee twee mense na afloop van ‘n liefdesteleurstelling worstel. Hulle het verder ook saamgespan vir ’n indrukwekkende weergawe van The Prayer wat deur Celine Dion en Andrea Bocelli opgeneem is. Sy het ook ’n nuwe baadjie aangetrek vir Mike Batt se Caravans, die temalied van die gelyknamige film wat in 1978 uitgereik is. Ander potensiële treffers sluit in Druppel in die emmer, Goeie ou dae, Vure Brand en Onder die invloed.

Juan Floors Oosthuizen, Danny Smoke en Deon van der Merwe se kitare asook Denny Lalloulette en Juan Floors Oosthuizen se baskitare sowel as Vinnie Henrico se tromme lewer ’n bydrae tot ’n baie meer volwasse kontemporêre klank. Evert van Niekerk, Lizelle le Roux, Jacques Fourie en Leonie Greyling met hulle viole sowel as Susan Mouton met haar tjello verleen ook ’n tikkie klassieke swier aan van die snitte.

Dié emosiebelaaide album slaag daarin om die kuns van lekker luister musiek deur middel van betekenisvolle lirieke te vervolmaak sonder om in voorspelbare melodieë of eentonige ritmes te verval. Daar is ’n nuutgevonde volwassenheid in Monique se werk te bespeur wat vir die eerste keer werklik aan die besondere vokale reikwydte van haar sopraanstem reg laat geskied. Mosaïek sal beslis aanklank vind by enigeen wat al die soet en die suur van die lewe sowel as die liefde gesmaak het.

https://www.google.com/url?sa=i&source=images&cd=&cad=rja&uact=8&ved=2ahUKEwiWiL6EtLPgAhUl1-AKHRCyAsAQjB16BAgBEAQ&url=https%3A%2F%2Fwww.youtube.com%2Fwatch%3Fv%3DCYKuP_JI7Ss&psig=AOvVaw1d102uD9dYR9H_cLpjBfbs&ust=1549965066707632

Leave a Reply

Translate »